ONG∙TELAIGIPA GAM-JINRANG:

Charamramgipa Sambolrang:

Ding∙gipa a∙jani sambolrang 1000 m chugipa biaprangona chaa.Bang∙bata buring bolgrimrangan ia distgricto iani ning∙o ga∙aka.

Ia a∙jani bolgrimrangara tangsimkamgipa buringrang, a∙rankario jakruronggipa bolgrimrang, wa∙grim-wa∙marang, am∙pangdamrang, chirikamni bolgrimrang aro  chibol chigitekni samrang iarangko man∙gopa. Buring mongsongbate bolsalgrimrang bang∙bata, indiba da∙ororo mitam biaprango segun bolrangkoba ge∙aha. Dokrobatgipa bolrangara boldak, boljadok ba chirore ba totgak, wakru, bolchu,chamchia ba chamolja ba samtolja, kasisok, boldujong, bolmring, jarul ba jalai, sidai, gambare ba bolgipok aro gipinrang.

Gipin samdim boldimrangoni  re∙su, mao, angkil wakbik, donggam, te∙misep ba amisep aro iarang gita gipin samdimrang a∙kosakko pindapa. Mitam boldimrangara silking, awilgep, garadek ba masanta buring , alot, kimkalong, aro gipinrang ong∙a. Mitam buringrango bolo wegagipa bidilrangara  wakmetom, passim, mari budu, su∙chenggil, sengmandil iarang gita bang∙bea gipin bidilrang gnang. Rokkomari wa∙arang a∙brigimikgimik wa∙anijat chaarangkoba  bang∙en nikna man∙a.

Sawe aro uni dolrang jedake me∙manggue, godarae, danagrang, rejak iarangni rokkomba bang∙en gnang. Bijak jakruronggipa bolgrimode a∙pao chakamgipa samdim doldimrang ko

mia aro wachiosan chabata, indiba tangsimkamgipa bolmagrimode  gong,  re∙ru, elachi buring, ta∙gong, takrak, gokarek, e∙chingburing indakgiparangko nikronga. Bolrango wegadoe chagipa rokkomni budurangba namen bang∙bea.Bolkambeo chagae bolko nisigipa do∙tekme aro do∙rimit iarangkoba nikronga. Balgitoni rokkomrang bolrango ma          ∙bake chagiparangba aditan gnang. Bilsina chaaigipa sambisarangoni  mikka kimpret, balsamburingni rokkomrang,  alotni rokkomrang, draka buring, bilikburing, me∙ga, kasi indakgipara

ngkoba biapni kri nikna man∙a. Sarat aro uni dolrang , rong∙kusimang, bolkusimang, aro uandakgipa samsirangkoba bolagipi aro rong∙totmarango jerangan chijimkama aroba chiringsamrango  nikna man∙a. A∙ba o∙e  cha∙rongani a∙sel buringrang pangsangon bolsalrangsa chabana a∙bachengskaaha. Chijimgipa aro chiringsam ba chigitek a∙palrango rokkom rokkom bilsina chadogipa rokkomari bibalgipa samdimrang samsirang aro samrasinrang  mai∙ragurang chaarangko nikna man∙a.

DO∙O MATRANG:

Bang∙bea matburingni gisepo iarangko ia jolo nikna man∙a:  Huro, makkre, ranggol,matchapeng, menggoburing dal∙gipa,  gitok rimit menggoburing, matwan,  gipi, matasim, balgitchak tokbrang, sial, ki∙megri makkre, gilwe, makkre chisam,  matcha chidual,  ang∙ke redu, ka∙bak rimit matram, mat bolma, sapao gisim, matdi ba marong, balgitchak, wakburing, makkre bolma, ranggol rimit, rokkom rokkom menggobrungrang, matcha bolga, makbil, matku∙chok, mese dal∙gipa, sapaoni gipin rokkomrang, okgipu,  mongma,  do∙bakni rokkomrang aro uandake dal∙a chona gipin matburing.

Dingtang dingtang nitobegipa do∙buringrang ia a∙jani buringrango bang∙en nikna man∙a, uarangoni iarangan mongsonggipa ong∙a:

Chebe, marek, moina, do∙karori, do∙butbut, renggok, inggek, do∙poni rokkomrang,  do∙budok, saruk gingte, saruknok,  saruka∙rong, grang gitchak do∙bret, do∙mesal, do∙grik, do∙maski tangsek, jollonggapgap, teteot, aro gipim chibolni do∙orang.

Mitam do∙oni rokkomrang jedake, do∙kore, do∙panggal, do∙chiong, do∙amek ba mewek, do∙pepe, sarampat,  do∙budok, do∙rangkal, waknolkakop, do∙maski, do∙po basu, bija cha∙gipa do∙tangsek, do∙reng, moina, sarukbrek, gipin gipin rokkomni chonchongipa do∙orang, renggokni dolrang,  do∙bakchil, alabokni rokkomrang,  do∙sikni rokkomrang, do∙chok, do∙patchi aro gipinrangko nikna man∙a.

Malamgipa chipu-matpuni dolrangoni  bang∙bea gan∙drakni dolrang, chipuni ma∙malrang, ki∙sing, katua, kangklakni dolrang,  gokge, garani rokkomrang, pusil a∙ga, te∙bibal tokgipa pusil,  matpu  aro ben∙chidikni rokkomrangko bang∙en nikna man∙a.

Bang∙bea  chipuni rokkomrangoni, chikil, me∙orbak, chipu na∙katok, chipu maraka, tongmitchang, grengrok, wa∙reke, tappinawe, chipu beng∙bek, aro gipinrang. Bisigrakbatgiparangoni gram karu, gram rete aro holinghap iarangba ong∙a.